İnterpress.az xəbər verir ki, bununla bağlı “RİA Novosti” agentliyində yayımlanan yazıda məlumat verilib.
Qeyd edilib ki, buna görə MDB ölkələri Rusiyaya ərzaq idxalını artıra biliblər.
Məsələ ilə bağlı “RİA Novosti” ilə fikirlərini bölüşən iqtisadçı Natiq Cəfərli deyib ki, Azərbaycanlı fermer və istehsalçılar üçün böyük imkanlar yaranıb.
“Rusiya və Qərb arasında münasibətlərin gərginləşməsi və qarşılıqlı sanksiyaların tətbiqi qonşu ölkələr üçün imkanlar yaradır. Azərbaycan, əlbəttə ki, bu vəziyyətdə dividendə malikdir”, – ekspert bildirib.
Onun sözlərinə görə, Rusiyaya kənd təsərrüfatı mallarının ixracında əhəmiyyətli dərəcədə artım var.
“Rəsmi məlumatlara görə, son altı ayda ixrac 19 faiz artıb. Azərbaycanlı fermer və istehsalçılar üçün Rusiya bazarına çıxış üçün böyük imkan yaranıb. Belə bir tələbat ortaya çıxıb. Bu əlaqələrin genişləndirilməsi üçün Azərbaycanda böyük potensial var”, – ekspert qeyd edib.
İqtisadçı İlqar Vəlizadə hesab edir ki, sanksiyalar Azərbaycan iqtisadiyyatı üçün müəyyənedici deyil, stimullaşdırıcı rol oynayır.
“Azərbaycan iqtisadiyyatı bütövlükdə qonşu dövlətlərin və bölgələrin iqtisadiyyatı ilə sıx əlaqədədir. Rusiya bazarı Azərbaycan üçün müstəsna əhəmiyyətə malikdir”, – o əlavə edib.
Vəlizadənin fikrincə, respublikada aqrar sahənin ixrac potensialı bir çox hallarda Rusiya bazarının tələbatı hesabına formalaşır.
“Və sanksiyalar burada müəyyənedici deyil, stimullaşdırıcı rol oynayır. Ötən il meyvə-tərəvəz məhsullarının ixrac həcmi əvvəlki illə müqayisədə 45 faiz artıb. Azərbaycandan meyvə və tərəvəzlərin ixracının, demək olar ki, 90%-i Rusiya bazarının payına düşür”, – o bildirib.
Rusiya ilə Qərb ölkələri arasında münasibətlər Ukraynadakı və Krım ətrafındakı vəziyyətlə əlaqədar gərginləşib. Qərb Rusiyaya qarşı sanksiyalar irəli sürüb.
Moskva 2014-cü il avqustun 6-da buna qarşı cavab tədbirləri ilə bağlı qərar qəbul edib. (Oxu.Az)
İnterpress.az
