İnterpress.az xəbər verir ki, bu barədə Trend-ə Azərbaycanın Çindəki ticarət nümayəndəsi Teymur Nadiroğlu bildirib.
Onun sözlərinə görə, bu, Çinin həcmli istehlak bazarında Azərbaycan istehsallın fəal təşviqinə imkan verəcək və ölkələrimiz arasında əmtəə dövriyyəsinin səviyyəsinə müsbət təsir göstərəcək: \”Çində birdən-birə iki şərab evinin açılması iki ölkə arasında bu növ məhsulların ticarətinin səviyyəsini yaxşılaşdırmağa, o cümlədən \”Made in Azerbaijan\” brendinin Çin bazarında irəliləməsinə imkan verəcək\”.
R.Nadiroğlu qeyd edib ki, Azərbaycanın şərab məhsulları ilə yanaşı, Çində nar şirələri, kompotlar, cem, həmçinin çay məhsulları çox populyardır: \”Çayın vətəni Çin olsa da, çinliləri Azərbaycanın qara çay növləri maraqlandırır. Bu gün Azərbaycandan çay ixracının həcmi böyük deyil, lakin çinli idxalçıların və istehlakçıların marağını bizim məhsulların bu növünə artırmaq üzərində işləyirik\”.
Ticarət nümayəndəsinin sözlərinə görə, yeni Azərbaycan pavilyonunda yalnız yerli məhsullar və mallar deyil, həmçinin Azərbaycan mədəniyyəti, turizm potensialı və digərləri təqdim olunacaq:
\”Gələcəkdə orada müxtəlif tədbirlər, həmçinin biznes və mədəniyyət sahəsində sərgilər keçiriləcək. Ümumilikdə, bizim Çindəki nümayəndəliyimiz yalnız ixracın təşviqi ilə deyil, həm də Çin investisiyalarının Azərbaycana cəlb edilməsi ilə məşğul olur. İki ölkənin dövlət başçıları ticari-iqtisadi münasibətlərin dinamik inkişafına böyük diqqət ayırır. Eyni zamanda bizim gördüyümüz işlər nəticəsində Çində Azərbaycan məhsullarına və ümumiyyətlə Azərbaycana müəyyən maraq var\”.
Xatırladaq ki, Azərbaycanın şərab evlərindən biri bu ilin noyabr ayında Beynəlxalq İdxal Sərgisi çərçivəsində Şanxayda açılacaq.
Dövlət Gömrük Komitəsinin məlumatına əsasən, ötən il Azərbaycanla Çin arasında əmtəə dövriyyəsi təxminən 1,3 milyard dollar təşkil edib. Bu, 2016-cı ilin göstəricisi ilə müqayisədə 33 faiz çoxdur. İxrac bir il ərzində 63,75 faiz artaraq 443,8 milyon dollar, idxal isə 21,4 faiz artaraq 854,5 milyon dollar təşkil edib.
İnterpress.az
