İnterpress.azxəbər verir ki, Beynəlxalq Kulinariya (Aşpazlar) gününü hər il dünyanın bütün ölkələrində keçirirlər. Bu tarix Ümumdünya Kulinariya Cəmiyyətinin təşəbbüsü ilə 2004-cü ildə təsis edilib. Hazırda təşkilatın 8 milyondan çox aşpaz üzvü var.
Azərbaycan Milli Kulinariya Mərkəzinin (AMKM) baş direktoru Tahir Əmiraslanov İnterpress.az-a bildirib ki, bu il əlamətdar peşə bayramını “Çörək festivalı” formatında qeyd etmək qərarlaşdırılıb.
“Ölkəmizdə “Çörək festivalı” ilk dəfədir təşkil olunur. Tədbirdə respublikamızın 24 şəhər və rayonunu təmsil edən kulinarlar iştirak edəcəklər. Festivalda çörək və şirniyyatlardan ibarət sərgi də təşkil olunacaq. Beynəlxalq tədbirdə Azərbaycanla yanaşı, Qırğızıstan, Türkiyə, Ukrayna və başqa ölkələri təmsil edən kulinarların iştirakı gözlənilir”, – deyə T.Əmiraslanov bildirib.
Xatırladaq ki, bu il avqustun 30-da “Muxtar Respublikanın “Naxçıvanqala” Tarix-Memarlıq Muzey Kompleksində “Naxçıvan çörəkləri” festivalı keçirilib.
Gülşanə Mustafayeva
İnterpress.az
