“Digər Milli Şura üzvünün də Ermənistan tərəfinə keçəcəyi…”backend

“Digər Milli Şura üzvünün də Ermənistan tərəfinə keçəcəyi…”

  • whatsapp
  • messenger
  • telegram
  • vkontakte
  • odnoklassniki

İnterpress.az xəbər verir ki, Yeni Azərbaycan Partiyasının İcra Katibliyinin Siyasi Təhlil və Proqnozlaşdırma şöbəsinin rəhbəri, millət vəkili Aydın Mirzəzadə AzVision.az-a bildirib ki, bu gün cəmiyyətin Milli Şura və müxalifətin radikal cinahına çox sərt suallar vermək hüququ var: “Nədən dünənə qədər onlarla hakimiyyətə qarşı mübarizə aparan insan bu gün düşmən tərəfə keçir və Xocalı soyqırımını törədənlərdən siyasi sığınacaq istəyir? Bunun özü göstərir ki, Milli Şuraya toplaşanlar və hakimiyyətə qarşı radikal mövqedən çıxış edənlərin siyasi düşüncəsi nədir.

Sabah digər Milli Şura üzvünün də Ermənistan tərəfinə keçəcəyi istisna deyil. Bunun özü göstərir ki, Milli Şura Azərbaycana kənardan, süni yollarla gətirilmiş proyektdir. Bəlkə də Ermənistan xüsusi xidmət orqanlarının iştirak etdiyi və uğursuzluğa düçar olan bir layihədir.

Azərbaycan demokratik, hüquqi dövlətdir. Siyasi mübarizə üçün kifayət qədər yer var. Amma, siyasi mübarizə dövlətçiliyə, müstəqilliyimizə qarşı düşmən önündə diz çökməklə olmamlıdır. Şahin Mirzəyev göstərdi ki, o, bu kateqoriyadan olan insandır. Belə çıxır ki, əlində müxalifət bayrağı tutanlar hakimiyyətə gələcəkləri təqdirdə Azərbaycanın müstəqilliyini belə qurban verməyə hazırdırlar”.

Milli Şuranın Şahin Mirzəyevdən imtina etməsinə gəlincə, YAP funksioneri deyib: “Onlar sussaydılar, daha ləyaqətli olardı. Ortada faktlar ola-ola dünənki üzvündən imtina etməyin özü siyasi mübarizəyə hazırlıqsızlarını, eyni zamanda hansısa qəti bir əqidə tərəfdarlarının olmadığını göstərir. Şahin Mirzəyev Milli Şuranın, onların ideologiyasının yetirməsidir. Onların siyasi düşərgəsində bərkimiş, bayrağını daşımış insandır. Bu gün onlar sözdə bu adamdan imtina edə bilərlər. Amma, dünənə qədər bir sırada görünürdülər”.

İnterpress.az