“Bunlar hamısı erməninin hiyləsidir. Rusun da satılanları bu hiylələrdə iştirak edirlər. Bu, Rusiya vətəndaşı olan Limonov və onun kimilərinin öz ölkələrinin rəhbərliyinə hörmətsizliyidir. Rusiya dövləti Azərbaycanın ərazi bütövlüyünü tanıyır, bu torpaqlar isə Azərbaycanındır”.
Şuşa Rayon İcra Hakimiyyətinin başçısı, Dağlıq Qarabağ Bölgəsinin Azərbaycanlı İcması İctimai Birliyinin sədri Bayram Səfərov “Yeni Müsavat”a Rusiyanın separatçı yazıçısı Eduard Limonovun qeyri-qanuni şəkildə Azərbaycanın işğal altındakı ərazilərinə gəlişi və ölkəmizi təhdid etməsinə münasibət bildirərkən belə dedi. İcma rəhbəri bildirdi ki, Azərbaycanın öz torpaqlarını istənilən yolla azad edəcəyini hər kəs yaxşı anlayır: “Ümummilli liderimiz də, möhtərəm prezidentimiz də bu torpağın bir qarışını da düşmənə verməyəcəyini dəfələrlə bəyan edib. Xalqımız da torpaqların azadlığından ötrü canından keçməyə hər an hazırdır. Azərbaycan ordusu da keçən ilin aprelində bütün dünyaya göstərdi ki, ərazilərimizi azad etmək qüdrətindədir”.
E.Limonovun Rusiyanın Qarabağı öz nəzarəti altına alması haqda sərsəm çağırış etməsinə gəldikdə, B.Səfərov Rusiyanın Dağlıq Qarabağı öz tərkibinə birləşdirməklə bağlı planının olduğuna inanmır: “Mən inanmıram ki, belə bir plan olsun. Bu, ermənilərin növbəti fitnə-fəsadı, şantajıdır. Mənə maraqlıdır, Limonov niyə saysız-hesabsız rusun məhvinə nail olmuş faşistlərə Ermənistanda qoyulan abidələrdən danışmır?”
İcma rəhbəri rəhbərlik etdiyi qurumun rus yazıçının anti-Azərbaycan çağırışlarına reaksiya verməsinə ehtiyac görmür: “Limonov kimdir ki, ona icma səviyyəsində rəsmi etiraz edək? Bu adam özü etiraf edir ki, türk düşmənidir, düşməndən ayrı nə gözləmək olar? O, ermənilərə satılmış birisidir. Limonov rus milləti üçün nə isə etsəydi, başa düşərdim. Amma indi heç mən rəva da bilmirəm ki, belə bir axmaq, tərbiyəsiz birisinə cavab verək”.
Politoloq Arzu Nağıyev isə əməkdaşımıza dedi ki, E.Limonovun Qarabağa gəlişi onun Rusiyanın mövqeyini əks etdirdiyi anlamını vermir: “Təbii ki, Limonovun özünün siyasi baxışları qatı millətçi kimi xarakterizə edilir. Yəni elə buradan da maraq doğur ki, bu birdən-birə haradan belə ermənipərəst oldu? Maraqlısı da odur ki, hətta qanunsuz gəlişində belə əsasən Rusiyanın mövqeyini nümayiş etdirməyə çalışır. Guya ki, gəlişinin məqsədini antitürk mövqeyi tutması ilə izah edir və Rusiya-Türkiyə münasibətlərinin normallaşmasını, müsbət şəkildə tənzimlənməsini istəmir. Məhz bu səpkili yazılarından sonra guya ermənilər onu Ermənistana dəvət ediblər. Yəni Limonovun təzadlı tərcümeyi-halına baxanda da hiss edilir ki, bu adam qızışdırıcı mövqedə olan, kimin daha çox maddi vəsait ödəməsindən asılı olaraq çıxış etməyə hazır olan psevdosiyasətçidir. Bu, hətta onun verdiyi müsahibələrdə də öz əksini tapıb”. A.Nağıyev düşünmür ki, Dağlıq Qarabağda Rusiya Limonov kimilərinin vasitəsilə Abxaziya və ya Cənubi Osetiya variantına gedə bilər: “Bu proseslər, sadəcə olaraq, ermənilərin özləri tərəfindən belə edilir ki, Rusiyanın onlarla bir yerdə olmasını göstərsinlər. Lapşin məsələsi yəqin ki, Limonova və onu kimilərinə dərs olmayıb. Azərbaycan Xarici İşlər Nazirliyinin mövqeyi dəstəklənməlidir ki, Limonovun Dağlıq Qarabağa səfəri qanunsuzdur və o artıq ”qara siyahı\”ya salınıb. Təbii ki, Azərbaycan sərhədinin qanunsuz keçilməsi ilə bağlı artıq onun üzərində cinayət faktı var. Bundan başqa, Azərbaycan əraziləri ilə bağlı verdiyi bəyanatlarda da bir sıra qanunazidd məqamlar mövcuddur. Bununla bağlı Azərbaycan tərəfinın müvafiq qərarlar qəbul edəcəyi gözləniləndir\”.
Azərbaycan XİN isə artıq E.Limonovun adını “arzuolunmaz şəxslər”in siyahısına əlavə edib. Gözləniləndir ki, müvafiq qurumlarımız faşist mövqeli yazıçının blogger Lapşin kimi qolubağlı Bakıya gətirilməsi üçün zəruri addımları atacaqlar. Hər halda, Rusiya Azərbaycanın ərazi bütövlüyünü tanıyırsa, məntiqlə işğal altındakı ərazilərə gedən, üstəlik, separatçılara açıq dəstək verən vətəndaşları haqqında da ölçü götürməlidir. Təbii ki, əgər beynəlxalq prinsiplərə sayğı və Azərbaycanla normal qonşuluq münasibəti varsa…
İnterpress.az
