İnterpress.az xəbər verir ki, 2 həftə əvvələ kimi bazarlarda 50 qəpiyə belə pomidor tapmaq mümkün ikən, hazırda sözügedən kənd təsərrüfatı məhsulunun qiyməti 1 manat 60 qəpiyə kimi qalxıb.
Pomidorun qiymətindəki artımın səbəbləri barədə BakuPost.az-a danışan aqrar sahə üzrə ekspert Vahid Məhərrəmov burada 4 əsas amilin rol oynadığını bildirib: \”Bunun səbəblərindən biri istixana məhsullarının kəskin şəkildə azalmasıdır. İkincisi, açıq şəraitdə yetişdirilən pomidor istehsalı ciddi azalıb. Əvvəlki illərə nisbətən az istehsal olunur. Üçüncüsü, istehsal olunan məhsul Rusiyaya ixrac olunur.
Dördüncüsü və ən əsası, pomidorun daşınma xərci artıb. Bu da benzinin qiymətinin artımı ilə bağlıdır”.
Ekspert bildirib ki, qiymət artımı pomidorla yekunlaşmayacaq: \”Ümumiyyətlə, bütün məhsulların qiymətində artım olacaq. Bu isə müəyyən dövrdən sonra baş verəcək. Benzin enerji daşıyıcısıdır. Benzindən kəndlilər, fermerlər istifadə edir. Daşınmada, istehsalda… Məhsulun yetişdirilməsi zamanı sahələrə baş çəkmək, ora iççiləri aparıb gətirmək, bəzi istehsal vasitələrini minik maşını ilə daşımaq… Bütün bunlar kəndlinin xərcini artırır. Bu da məhsulun qiymətində özünü göstərir”.
İnterpress.az
