2018-ci ildə silahlı münaqişələrdə 12 min azyaşlı ölüb və ya şikəst olub – BMTbackend

2018-ci ildə silahlı münaqişələrdə 12 min azyaşlı ölüb və ya şikəst olub – BMT

  • whatsapp
  • messenger
  • telegram
  • vkontakte
  • odnoklassniki

İnterpress.az təşkilatın saytına istinadla xəbər verir ki, hesabat münaqişələrin olduğu 20 ölkədə aparılan tədqiqatların nəticəsində hazırlanıb.

BMT-nin Baş katibi Antonio Quterreş bu faktı, habelə uşaqların hüquqlarının kobud şəkildə pozulmasını yolverilməz adlandırıb. Qeyd edib ki, Somali, Suriya və Nigeriyada azyaşlıları silahlı qruplaşmalara döyüşçü kimi cəlb edirlər. Belə ki, 2018-ci ildə 8 min uşaq hərbi əməliyyatlarda iştirak edib. Bundan başqa, cinayətkar dəstələr uşaqları oğurlayır, işgəncələrə və seksual istismara məruz qoyurlar.

Hesabatda qeyd olunur ki, ötən il qız uşaqlarına qarşı 933 seksual zorakılıq halları qeydə alınıb, lakin bu, yalnız rəsmi rəqəmlərdir və zorakılığın qurbanlarının sayı qat-qat çoxdur. Hesabat dövründə məktəblərə və xəstəxanalara silahlı basqınlar nisbətən azalıb, lakin silahlı münaqişə zonalarında, xüsusən Əfqanıstan və Suriyada bu cür halların sayı xeyli çoxalıb. Təkcə Malidə 827 məktəb bağlanıb, 244 min azyaşlı təhsil hüququndan məhrum olub.

Sənəd müəllifləri qeyd edirlər ki, ötən il hökumət qoşunları tərəfindən uşaqlara qarşı törədilən cinayətlərin sayında da artım var. BMT Baş katibinin silahlı münaqişə zonalarında uşaqların vəziyyəti üzrə xüsusi nümayəndəsi Virciniya Qamba bildirib ki, münaqişələrin uşaqları necə məhv etdiyini görmək çox ağırdır. Onun sözlərinə görə, tərəflər azyaşlıların müdafiəsini həyata keçirməli, onların hüquqlarını pozmamalıdır. Qamba əlavə edib ki, silahlı qruplaşmalarda iştirak edən uşaqları da cinayət məsuliyyətinə cəlb edirlər. Ötən il minlərlə azyaşlı bu ittihamla həbs olunub.

Hesabata şərh yazan BMT-nin Baş katibi silahlı münaqişə tərəflərinə xatırladıb ki, onlar mülki əhaliyə, o cümlədən uşaqlara hücum etməmək üzrə götürdükləri öhdəliklərə əməl etməlidirlər. O əlavə edib ki, silahlı münaqişələrdən əziyyət çəkən azyaşlıları qorumağın ən yaxşı yolu sülhdür.

İnterpress.az