Azərbaycan Respublikasının Diasporla İş üzrə Dövlət Komitəsi (DİDK) xaricdə yaşayan gənc diaspor nümayəndələrini “Diaspor Gənclərinin I Yay Düşərgəsi”nə dəvət edir.
DİDK-dən İnterpress.az-a verilən məlumata görə, “Diaspor Gənclərinin I Yay Düşərgəsi”ndə iştirak etmək istəyənlər üçün xüsusi meyarlar nəzərdə tutulub.
Belə ki, 15-20 avqust 2018-ci il tarixində təşkil ediləcək düşərgənin məqsədi Azərbaycan Xalq Cümhuriyyətinin (AXC) yaradılmasının 100 illiyi münasibəti ilə dünyada yaşayan Azərbaycan əsilli gəncləri bir araya gətirərək diaspor hərakatını gücləndirməkdir.
İştirakçı seçimi meyarları aşağıdakılardan ibarətdir:
· 18-29 yaş qrupunda olmalı;
· Azərbaycan dilində ünsiyyət bacarığı;
· Diaspor nümayəndəsi və ya diaspor təşkilatının üzvü olmalı;
· Düşərgə müddətində tam davamiyyətə məsul olmalıdır.
İş qaydası: Düşərgədə qrup müzakirələri, Azərbaycanın tarixi və mədəni yerlərinə ziyarət, rəsmi və tanınmış şəxslərlə görüşlər, əyləncəli-maarifləndirici proqramlar keçiriləcək. Düşərgədə tam iştirak edən iştirakçılar diplomla təltif olunacaqlar.
Xərclər: Diaspor Gənclərinin I Yay Düşərgəsi ödənişsizdir. İştirakçıların bütün xərcləri (yol xərcləri, viza, yaşayış, yemək, daxili nəqliyyat, səyahət sığortası) tam şəkildə qarşılanacaq.
Müraciət prosesi: Aşağıda göstərilmiş bütün sənədlər 30 iyun, 2018-ci ilə qədər http://www.diaspora.gov.az/qeydiyyat/ link vasitəsi ilə elektron şəkildə təqdim olunmalıdır.
· Ərizə forması
· Dəstək məktubu (Üzvü olduğu diaspor təşkilatı, Azərbaycan Respublikasının xarici ölkələrdə akkreditasiya olunmuş nümayəndəliyi (səfirlik/konsulluq) və bu və ya digər formada Azərbaycan Respublikası ilə hüquqi bağlılığı olan təşkilatlardan)
· Pasportun surəti
Qeyd edək ki, Diaspor Gənclərinin I Yay Düşərgəsinə seçilən namizədlərlə 15 iyul 2018-ci il tarixinə qədər əlaqə saxlanılacaq və video görüntülü müsahibəyə dəvət ediləcək.
İnterpress.az
