Türkiyədə keçirilən prezident seçkilərində AKP-dən namizədliyi irəli sürülmüş Rəcəb Tayyib Ərdoğanın və parlament seçkilərində \”Cumhur\” İttifaqının qalib gələcəyi təqdirdə Azərbaycanda R.T.Ərdoğanın və MHP lideri Devlət Başahçelinin qələbəsi qeyd ediləcək.
Bu barədə İnterpress.az-a Ülkü ocaqları Təşkilatının Azərbaycan nümayəndəliyinin sədri Hakan və Seyhan və Azərbaycan-Türkiyə Evinin (ATEV) icraçı direktoru Toğrul Allahverdili məlumat verib.
Onlar bildirib ki, dəstək aksiyası Türkiyənin Azərbaycandakı səfirliyinin qarşısında yerli vaxtla saat 21:00-da başlayacaq.
Aksiyada gənclər və ictimaiyyət nümayəndələri iştirak edəcək.
Qeyd edək ki, prezident seçkilərində Türkiyənin hazırkı prezidenti Rəcəb Tayyib Ərdoğan, Cümhuriyyət Xalq Partiyasının (CHP) namizədi Məhərrəm İncə, İyi Partiyanın sədri Meral Akşener, Səadət Partiyasının sədri Təməl Karamollaoğlu, Vətən Partiyasının sədri Doğu Perinçək və Xalqların Demokratik Partiyasının (HDP) həbsdə olan namizədi Səlahəddin Dəmirtaş mübarizə aparacaqlar.
R. T. Ərdoğanın namizədliyini sədri olduğu hakim Ədalət və İnkişaf Partiyası (AKP), Milliyətçi Hərəkat Partiyası (MHP), Böyük Birlik Partiyası (BBP) və Hüda-Par dəstəkləyir.
Parlament seçkilərində mübarizə aparacaq siyasi partiyalar isə AKP, MHP, BBP, CHP, İYİ Partiya, Səadət Partiyası, Demokratik Partiya, Xalqların Demokratik Partiyası, Müstəqil Türkiyə Partiyası, Müstəqil Mübarizə – HÜDA Partiyası, Vətən Partiyasıdır. AKP və MHP parlament seçkilərinə birgə blokda – “Cümhur ittifaqın”da qatılacaq. BBP namizədləri isə “Cümhur ittifaqın”da AKP namizədləri qismində yer alıb. CHP, İyi Partiya, Səadət Partiyası və Demokratik Partiya isə parlament seçkilərinə “Millət ittifaqı”nda qatılır.
Türkiyədəki 59 milyon 391 min 328 vətəndaş səsvermə hüququna malikdir. Bu seçicilərin 56,3 milyonu Türkiyədə, qalanı isə xarici ölkələrdə yaşayır. Bundan əvvəl xaricdəki seçicilər üçün səsvermə prosesi başa çatıb, bülletenlər Türkiyəyə gətirilib.
İnterpress.az
